تبلیغات
ممقان - ممقان شهری نین موشخّصاتئ

امروز:

ممقان شهری نین موشخّصاتئ

ممقان دوغو آذربایجان شهرلریندن دیر.تبریزدن 30 كیلومئتر فاصیله سی وار و تبریزین گونئی باتئ سیندادیر.1332 شمسی ایلینده بو شهرده بلدیّه(شهرداری) دایر اوْلونوب و ایندی ایسه بخشداریسی وار. اوْن بئش مینه یاخین جماعتی وار و اوْنلارین 85 فاییزدن چوْخو ساوادلیدیر.1298 اینجی ایلده بو شهرده یئنی اوصولدا مدرسه داییر اوْلونوب كه اهالی نین ساوادلانماسیندا چوْخ بؤیوك تأثیرگؤستریب.بو مدرسه نین آدئ «عنصری» مدرسه سیدیر.

 ممقان دؤرد محلّه یه مالیك دیركی اوْنلارین آدلارئ بونلاردان عیبارتدیر:آشاغا كوچه -یوخارئ محلّه - مزیددی - امیشج لاكین شهر بؤیوكلندیكجه یئینی محلّه لر ده تیكیلیب كی اهالی بو یئنی محلّه لری ده ترتیب ایله قدیم محلّه لره یاخینلیغینا گؤره قدیم محلّه لرین اوستونده حئساب ائدیرلر.اهالی نین 100 فاییزی موسلمان دیر و هامیسئ شیعه مذهبیندن تبعیّت ائدیرلر.بو شهردن بؤیوك مجتهدلرو عایلملرده چیخیبلار كی ماماقانین فخرینه چئوریلیبلر.او جومله دن آیت ا... ابوالقاسم ممقانی 2- آیت ا... شیخ یوسفعلی ممقانی 3- حاج شیخ عبدا... ممقانی 4- شیخ محمّدحسن ممقانی و... بو بؤیوك اینسانلارا میرزه محمّدتقی نیّر ممقانی كی سهواً و یا عمداً نیّر تبریزی آدییلا تانیتدیریلیر.همچینین پیر جابر ممقانی كه 7 اینجی یوز ایلین عاریفلریندندیر و ماماقاندا اوْنون قبری بؤیوك زیارتگاها مبّدل اولونوب.شیخ اسدالله ممقانی ده ماماقانین موعاصیر شخصیّتلریندن ان بؤیوكلریندن بیریدیر.بو بؤیوك اینسان ایجتیهاد درجه سینه چاتان بیر عالیم ایدی.او ایرانین عدلیّه ناظیری(وزیری) اولوب و نئچه عدد اؤنملی تألیفلرین صاحیبی دیر.

  ماماقاندا چوخلو آبیده لر (قدیم تیكیلمیش یئرلر) كی او جومله دن تورامین كندی دیر كی ماماقانا یاپیشیب و بو زاماندا بیر كیلومئتردن آزفاصیله سی وار.بو یئرده بیر مسجید گؤرونور كی 500 ایل دن چوْخ سابیقه سی وار و اورادا اوْلان قبیر داشلارئ بو مؤوضونو گؤستریر.پیر حیرانین اؤز قبیری ده بوآبیده لردن بیری دیر.ماماقاندا سو دَییرمانلارئ دا وار كی زامان كئچدیكجه اوْنلارین چوْخو دا آرادان گئدیب و ایندی دؤرد یا بئش عدد اونلاردان قالیر كی اونلارین تیكیلیش تاریخی هئچ شخصین یادیندا دئییل و دئمك اولار كی اونلارین 200 ایلدن چوخ سابیقه سی وار.

ماماقاندا 120 عدد دن چوخ سو گؤلو وار كی اهالی كئچمیش زامانلاردا اؤز اللری ایله قازیبلار كی ماماقان كیمی داشلئ بر یئرده بو تعداد گؤلون اولماغئ اهالی نین قدیم دن چالیشقان اولدوغونو گؤستریر.بو گؤللرین ان بؤیوكلری میانجئ - زینه -پره خوننی - دره وار -محمدبیك - دؤندی دیرلر.لاكین خودایی - میرزه زینه سی - باقیر گؤلو- ارزن - یئی گؤلو و ساییر گؤللرده وار كی ماماقان یئرلری نین سویونو تأمین ائدیرلر.

ماماقاندا 1382 اینجی ایلدن آزاد دانشگاه داییر اولونوب .بو شهرده بو دانشگاهدان علاوه سما دانشكده سی و پیام نور دانشگاهئ دا وار.همچینین دانشگاه آذربایجان تبریز ماماقان شهری نین یئرلرینده واقع اولوب كی بو بؤیوك یئری ماماقانین بؤیوك و علم سئور اهالیسی مجانی حالتده علمین یاییلماغئ یولوندا دؤولته ایتحاف ائدیبلر.

شهید سلیمی صنعتی شهركی ده ممقان شهرینه باغلئ اولان مكانلاردان بیریدیر.بو شهرك نئچه ایل اوّل ممقان اهالیسی نین دؤولته پولسوز پاراسیز و مجانی حالتده تقدیم ائتدیكلری بؤیوك یئرده تیكیلیب كی اوستاندا ان بؤیوك صنعتی شهردیر و ایراندا دا اؤزونه گؤره بؤیوك مقاما مالیك دیر.

آردئ وار...

یازار:بابك دلالی ممقانی



نوشته شده در : سه شنبه 5 خرداد 1388  توسط : بابك دلالی ممقانی.    نظرات() .